Zwei Schwäbische Philosophen und ihre Sprüche
Sie sollten beide etwas ältlich (Knecht und Magd) angezogen sein,
auf einer netten Bank sitzen und dann die Sprüche von sich geben.
Sie: Geschdern hanne dai Frau gsäh, se hott mi aber ett gsäh.
ER: Jo, se hotts gsait.
Kleine Pause
Sie: Jo, jo, wenn oiner amol uff em Gaul hockt, sieht r diea dronta nemme.
ER: Ha, dommschdella goht leichter wia gscheit sei.
Sie: Mancher merkt net amol wenns regnat, so arg gscheit isch der.
ER: Bloß de Domme moinet, de Gscheide wisset älles.
Sie: Wenn i so gscheit wär, wiea du sei sottsch, no häätet mir boide zwoi prima Kepf.
ER: S´gibt Domme ond Saudomme. Domm be i net.
Sie zum Publikum, auf ihn deutend:
Der spricht 4 Sprocha: hochdeutsch, schwäbisch, durch d´Nos ond iber d´Leit.
PAUSE
Sie: Hosch daim Chef jetzt gsait, daß da meh Geld brauchschd?
ER: A wa, d´Schulda verfauled net, mr beigts oft gnuag rom.
Sie: D´Herra send älle recht, solang mr se net braucht.
ER: Was oim d´Herra gebet, verreißt oim da Sack net.
Sie: Vo de reiche Leit ka mr´s schpara lerna, vo de Arme s´Schenka
ER: Wer zeidig s´bettla afangt, schtirbt net arm.
Sie: Wo Geld isch, isch dr Deifl, wo kois isch, isch er zwoimol.
ER: Ond wer offs erba hofft, goht barfuß.
Sie: Beim Erba isch guat, daß dr Mensch alloi sei.
ER: Do hoißts au: a bissle isch emmr no besser wia gar nix.
Kleine Pause
Sie: Wia gohts dr sonschd?
ER: Wenn mr no gsond isch ond guade Schuah hot, daß mr dr Arbet drvo laufa koa.
Sie: Mit dir werds au nemme besser, s´hoißt emmer no bei Dir liabr a Ranza vom Fressa, als an Buckl vom Schaffa.
ER: Mr glaubt gar net, was en oin nei goht, wenn mr langsam duet beim Essa.
Sie: Ond a anderer zahlts
ER: Liabr zviel ess als zwenig drenka.
Sie: S isch iberall guat Brot essa, wenns do isch.
PAUSE
ER: Ond Du, gugsch emmr no noch dem stramma Knecht?
Sie: A alte Kuah schleckt au no gern Salz.
ER: Was nitzt de schenscht Kuah, wenn se koi Milch gibt.
Sie: Was woiß d´r Ochs wenns Sonndich isch, sgibt am neamerd a frischs Hemd.
ER: Jo jo, au dr gscheideschd Knecht ackert mol a kromme Furch.
Er zum Puplikum:
Frier wa se bildschee, jetzt isch bloß no s´Bild schee.
Sie: Du bisch koi wiaschter, aber schee bisch au net.
Zusammen:
Wenn mir tätet, was mer sottet, tät dr Herrgott, was mir wellet.
"zusammengestellt von Kurt Hindennach"
