Vorbereitungen zum 50.

(echt schwäbisch - von Hilde Weißer)

Jetzt isch er endlich do der Tag,
auf den i so lang g`wartet hab.
A halbs Johrhondert isch verganga,
seit mei Leb hot a`gfanga.
Ond wenn i so zurückdenk heut,
gad wie im Flug verging die Zeit.

Vor einiger Zeit hab i dann beschlossa,
der Geburtstag, der wird so richtig begossa,
ond um des Fescht zu optimiera,
hab i a`gfanga zu organisiera.

Doch liebe Leut i sag euch des,
50 werde des isch Streß.

I hab a Gästelist`erstellt,
damit am End jo niemand fehlt.
No braucht m`r zÈssa ond au z`Trinka
Ond an Wirt um eizuschenka.
Net schlecht dabei wär a Musik,
doch do fällt mir ei zum Glück,
überall wo Feschtle send,
do isch d`r Matte Fritz present.
Ond wie i g`frogt hab, said er glei,
ha, den Termin hab i no frei.
An Saal zum Feschta tät no fehle,
wo den hernehma ond net stehla.
Gut, daß mir nette Nachbarn hend,
die oim do behilflich send.

Ihr liebe Leut i sag euch des
50 werde des isch Streß.

Daheim da seh i voll Entsetza,
i hau em Kaschta lauter Fetza.
Ihr liebe Leut was zieh i a,
jetzt fäng die ganz Kommede a.
No gucksch en Spiegel nei ond denksch,
a paar Pfond weg, no wärsch die Schenscht.
En jeden Lade bin i g`rennt,
ob i net ebbes für mi fend.
Vielleicht kasch no a Schnäppchen mache
em Schlußverkauf gibt’s billige Sache.
Es isch a Elend liebe Leut,
ob lang ob kurz ob eng ob breit,
ob raot ob geal ob grea ob blau,
was paßt wohl zur a 50er Frau?


Schließlich hab i no ebbes g`fonda,
ihr sehet jo den blaue Lomba.
Wenn i mei Ma net g`het hätt no,
wär i heut Obet gar net do.
Sei Rat ond au sein Portmonaie
send mit sehr behilflich g`we.
I tät schonst jetzt no, Ihr werdet lache,
bei C & A die Wühlmaus mache.

Ihr liebe Leut i sag euch des
50 werde des isch Streß

Wie i mi so betracht em Spiegel,
merk i, i seh jo aus wie a Igel,
Ganz dringend muscht no zum Friseur,
sag i so leise vor mi her.
A Farb muß druff, a bißle fetzig,
bisch jo erst 50 no net 60.
An neia Schnitt ond neie Locke,
a bißle onder d`Haube hocke.
Von henda g`sehe gar net schlecht,
doch em G`sicht do sieht mers, echt,
Do kommet scho die erste Falte,
wie ka i des denn bloß uffhalte.

A Lifting isch mir z`kompliziert,
do wird eifach Make-up druffg`schmiert.
Vorher no g`hörig s`Gsicht massiera,
ond Anti Falte Creme druffschmiera.

I renn no schnell zum Schlecker nei,
ond kauf für d`Scheheit ebbes ei.
Revial Lift wird angeprießa,
wenn des net hilft freß i an Besa.
En 14 Tag send Falte weg,
so stoht`s ganz groß en dem Prospekt.

Ihr liebe Leut i sag euch des
50 werde des isch Streß.

I guck mi a von älle Seita,
der Spruch isch wohr, Scheheit muß leida.
Do hends dia Männer net so schwer,
ma holt eifach den Nodelstreife her,
jetzt no a Hemd, Krawatt ond Schua,
ond fertig isch d`r schene Bua.

Doch jetzt hab i gnug g`schwätzt ond sitz na,
ond fang mit Euch zu feira a'.