Schwäbisches Gedicht zum 60. Geburtstag (für Ihn) für einen Gutschein zur Fusspflegerin

Alexandra Hauber


(Hier heißt sie Heike)

S' isch net so oifach mea, mei Liaber,
wenn'd scho 60 bisch ond drüber,
do zoigat sich so manche Falda,
am ganza Körper schpürsch scho's Alter.

Losch dei Fiaß net so arg leida,
kosch mit dem Schei ronderneira.
Drom hemmer denkt, mir schenkat Dir,
an Gutschei, net vom Juwilier.

Noi an Gutschei für a Fußmassage,
des hilft dir besser, en deiner Lage.
Des loßt die besser laufa,
musch koine Krügga kaufa.

2 Möglischkeita hosch do nur,
je noch Bedarf ond Fußstrucktur.
Musch sorgfältig dir des no raus sucha,
I erklär's dir g'schwend, musch net flucha.

Erschtens wär do a Normalbehandlung,
des hilft deine Fiaß zu'ra Wandlung.
Für zarte Männer isch des dacht,
des wird für'd Entspannung g'macht.

Am A'fang wärat dei Fiaß badat,
des hot no niemand g'schadat.
Do kommt a guat's Diftle nei,
no riachat deine Fiaß au fei.

Heike macht dir dei Fiaß drogga
ond du kosch g'mütlich auf'm Stuhl hogga.
Zum tringa gibt's Kaffee oder Tee,
no, isch des net schee??

Dann wärat Nägel rond g'schnieda,
d'Heike ko des guat, des isch net übertrieba.
No griagsch a guada Creme drauf,
des macht Fiaß woich, baß no auf!

Do kosch jetzt Sandala traga
ond musch net mit Socka verzaga.
So läuft a Normalbehandlung ab,
do macht no koiner schlapp.

Druckstella werat raus g'macht, beim zwoite,
des isch dann scho was für härtere Leute.
Bevor dia guada Creme drauf kommt,
nemmt se s'Messer für dia Schronnt.

Abg'hobelt wird dia alda Haut,
damit se net am Fuaß verfault.
Steckwarza werat druckfrei g'macht,
des duat weah, do hot no koiner g'lacht.

Hühnerauga ko Heika au behandla,
musch dann net em dunkla wandla;
mit dene sisch ja sonscht au nix,
dia den bloß recht weah - zehfix.

Wenn dann no willsch, losch Zeh lakiera,
musch de deswega net scheniera.
No kommt dia guada Creme drauf,
ziagsch dei Socka a ond schtesch auf.

Ond zum Zahla nemmsch den Schei,
ebbes andres fällt mir nemme ei.
Alles guade, viel Glück ond G'sondheit,
wünscha mir dir, ben dann fertig soweit.