Mundart (Memmingerisch) zum 80gsten Geburtstag einer DameDie Jubilarin hat in ihrer Einladung vermerkt, dass sie mit 80 nun nichts mehr brauche, ausser zwei Gs – darauf bezieht sich das Gedicht
Die ………… moit, sia braucht koi G schenk,
ausser zwoi G s ` was isch iatz des ???
Do gang i glei ond suach
en meim Memminger Wörterbuach
auf dr Seite mit m G
ond glaub fascht it was i do seh:
dia Memminger hand koin Defekt
noi, dia sprechad Dialekt.
Ond den soll ma au bewahra –
denn wer soschd kah G aiwägala fahra?
Fir da G ogs hend se an G rend,
G rampa isch a ofirmigs Kend.
Zom Kaffee geits an G oglopf,
zwoi G uggr hend se au em Kopf.
G iegala hoißt dr Rest vom Brot,
a G ischbl soggad wia a Bott.
Gand se spaziera hand se a G laif,
manchmol send dia G loichla steif.
Em G ätla dend se s G mias abaua,
em G ompa kah sich sWasser staua.
A G luhfamichl isch it grad gscheit,
mit ma alta G eppl kommsch it weit.
En jedem Hof schreit garantiert
an G oggalr firs Henna- G miat.
So viele G rattler geits im G ai,
manches G schmois isch au drbei.
G ruscht ond G rempl ond a G frett
des hod ma gnua ` des braucht ma nett.
Iatz mach mr gar koi langes G schieß,
denn ois isch doch ganz gwieß:
A G reatla griagsch ond guck –
koine Pralina ond koin Schmuck –
denna send bloß G uatsla enra G ugg,
au no a G luhf zom Wäsch aufhenga,
a Fenchelteele gega ?s G remma,
G rombiera fir dei Mittagessa,
G aggala – hend mr doch glatt vergessa.
I iberleg, was gäbs denn no?
A G ätla? ` brauchschd it ` hoschd ja scho.
Wie wär a G aus em Haberstroh?
A G oißla fir da Stall `
des bräuchdesch no auf jeden Fall
G uatala han iatz koin Zweck
Weihnächta isch no weit weg
Zom Schluss no oin Versuach ` könnt sei,
do isch des Richtige drbei:
liebe ……………..,
mir wünschad Dir zu deinem Feschd
recht viel G aude heit ond lieba G äscht
an Haufa G lück ond no viel G sondheit
a frohes G miat, G elassenenheit
Von uns dann no a wenga G eld –
vielleicht isch des a G des
Dir au ganz guat gfällt?
"Ingrid Mangold"
